प्राणघातक रोगले गर्दा जीवन र मृत्युबीच जुझिरहेछ मेधावी छात्रा, परिवारद्वारा सहयोगको अपील

राजगञ्ज : गरिब परिवारकी मेधावी छात्रा प्राणघातक बिरामीले गर्दा हाल मृत्युसित जुझिरहेकी छन्। यस्तो स्थितिमा तिनको परिवारका सदस्यहरूले सबैसित सहयोगको गुहार लगाएका छन्। अजीमा खातुन राजगञ्ज सन्न्यासीकाटाको पश्चिम बालाबारी निवासी हुन्। तिनको बाबु अजीजुल हक र आमा आयशा खातुनले दैनिक मजदुरीको काम गर्ने गर्दछन्। अजीमाले बालाबारी एक्रामिया हाई मदरसाबाट माध्यमिक परीक्षामा ब्लकमा टप गरेकी थिइन्। हाल तिनी सिलगढीको सूर्यसेन कलेजमा अङ्ग्रेजी अनर्सको द्वितीय वर्षकी छात्रा हुन्। केही दिन अघि बिमार भएपछि डाक्टरकहाँ गएर जाँच गराउँदा एसएलई अर्थात् अटो इम्युन डिजीज नाम गरेको प्राणघातक बिरामीले पीडित रहेको थाहा पाइन्। यसपछि अजीमालाई उपचारको लागि सिलगढीको एउटा निजी अस्पतालमा भर्ना गरे तापनि आर्थिक अभावले गर्दा परिवारका सदस्यहरूले छोरीको उपचारको खर्च उठाउन सकेनन्। उपचारको लागि अजीमालाई बाहिर लैजान लाखौँ रुपियाँको खाँचो भएकोले परिवारका सदस्यहरूले सबैसित सहयोगको गुहार लगाएका छन्।