प्रार्थी छिरिङ दाहालको समर्थनमा खरसाङको गोथल्स् साइडिङमा चुनावी सभा

खरसाङ : खरसाङको टुङ सन्तमेरिज समष्टि अन्तर्गत गोथल्स् साइडिङ गोजमुमो विनय खेमा प्रतिनिधिहरूको आयोजनामा प्रार्थी छिरिङ दाहालको समर्थनमा गोथल्स् साइडिङ सार्वजनिक भवनमा आज चुनावी सभा सम्पन्न भयो। सुधिमान सुब्बाको सभापतित्वमा सम्पन्न चुनावी सभालाई खरसाङ महकुमा समिति महासचिव अनोश थापाले सम्बोधन गर्दै यसपालीको विधानसभा चुनाउमा सबैले आफ्नो मतदान सोचेर सम्झेर खलास्ने अनुरोध गरे। आउँदो विधानसभा चुनाउमा गोजमुमो विनय खेमाका प्रार्थी छिरिङ दाहालको पक्षमा सिटीको चिन्हमा मतदान गरेर विजय बनाउने तिनले सबैसित अपील पनि गरे। चुनावी सभालाई टुङ सन्तमेरिज समष्टिका नुरी शेर्पा, सांगठनिक सचिव बिरेन तामाङ लगायत स्थानीय प्रतिनिधिहरूले सम्बोधन गरेका थिए। उक्त सभामा खरसाङ महकुमा युवा मोर्चा सभापति पेबेन्द्र गुरूङ,  समष्टि युवा मोर्चा सचिव दिपेश तामाङ, डीटीडीपीएलयु जोनल सभापति तथा प्रचार प्रसार सचिव बसन्त कुलुङ राईको विशेष उपस्थिति रहेको थियो।