सिलगढी (निसं): राजेश छेत्रीको नेतृत्वमा सिलगढ़ी नगरनिगमको 42 नम्बर वार्डका 24 जना तृणमूल कङ्ग्रेसका समर्थकहरू मार्क्सवादी कम्युनिष्ट पार्टीको सामेल भएका छन्। पार्टीको राज्य सचिव मण्डली सदस्य जीवेश सरकार, माकपाको दार्जीलिङ जिल्ला सचिव सुमन पाठक, माकपाको जिल्ला सचिव मण्डली सदस्य क्रमैले नुरूल इस्लाम अनि दिलीप सिंह, डाबग्राम एरिया कमिटीका सचिव खुदिराम राय आदिले उनीहरूलाई माकपाको लाल झण्डा सुम्पिएर पार्टीमा स्वागत जनाए। आइतबार पार्टीमा सामेल हुनेहरुमा विगतमा 42 नम्बर वार्डका विभिन्न शाखाका सचिवहरू, लोकल कमिटीका सचिव आदि थिए। माकपामा सामेल भएपछि राजेश छेत्रीले भने, हामी जनताको काम गर्न पाउनको निम्ति सत्तारूढ़ पार्टीमा गएका थियौं।
कुनै जमीनको धन्धा, व्यापारीहरूको दलाली खान, बालुवा बजरीको कमिशन खान तृणमूल कङ्ग्रेसमा गएका थिएनौं। 42 नम्बर वार्डको जनताको विभिन्न समस्या सरकारले पूरा गरिदिनेछ भन्ने प्रतिश्रुति तृणमूल कङ्ग्रेसका शीर्ष नेता एवं मेयर गौतम देवले दिएका थिए। तर चुनाउ जितेको आज दुइ वर्ष पुग्न लाग्यो त्यो प्रतिश्रुति केवल प्रतिश्रुतिमै सिमित रह्यो। सरकारमा रहेको बोर्डले यति दिनसम्म केही गर्न नसकेपछि अब यो पार्टीमा बस्ने औचित्य नरहेको हुनाले हामी पुनः माकपामा फर्की आएका हौं।