राजगञ्जको लुगा गोदाममा आगलागी, विधायक तथा बीडीओ-द्वारा घटनास्थलको निरीक्षण

राजगञ्ज : राजगञ्ज बजारको एउटा लुगाको गोदाममा आगो लाग्दा लगभग डेढ करोड रुपियाँको क्षयक्षति भएको छ। प्राप्त जानकारी अनुसार राजगञ्ज बजारमा रहेको एउटा लुगाको गोदाममा विभिन्न इलाकाका व्यवसायीहरूले लुगाहरू राख्ने गर्दछन्। गत राति उक्त गोदाममा आगो लागेपछि स्थानीय मानिसहरूको सहयोगमा आगोलाई निभाउने प्रयास गरियो। यसपछि जलपाईगढी तथा फुलबारीबाट दमकलको 4 वटा इञ्जिन घटनास्थलमा पुगेर धेरै समयको प्रयासपछि आगोलाई पूर्ण रूपमा नियन्त्रणमा ल्याए तापनि गोदाममा राखेको लगभग सबै लुगाहरू जलेर खरानी भएको बताइएको छ। घटनाको खबर पाएपछि आज बिहान राजगञ्जका विधायक खगेश्वर राय तथा बीडीओ पंकज कोनार घटनास्थलमा पुगेर पीडित व्यवसायीहरूसित कुराकानी गर्नको साथै क्षतिपूर्ति दिइने आश्वासन पनि दिए। व्यवसायीहरूले बताएअनुसार लगभग 100 जना व्यवसायीहरूले उक्त गोदाममा लुगाहरू राख्ने गर्दथे भने तिनीहरू सबैले पुजाको लागि धेरै मात्रामा लुगाहरू उक्त गोदाममा राखेका थिए। तर गत राति आगलागी हुँदा गोदाममा राखेको सबै लुगाहरू जलेर खरानी भएकोले लगभग डेढ करोड रुपियाँ क्षति भएको तिनीहरूले बताए। तथापि, के कारणले गर्दा उक्त आगो लागेको हो भन्ने विषयमा हालसम्म थाहा लागेको छैन। उक्त गोदाममा बिजुलीको कनेक्सन नरहेकोले रातिको समयमा समानहरू राख्नको लागि मोमबत्ती जलाउने गर्दछौँ। उक्त मोमबत्तीबाट पनि आगो लागेको हुनसक्ने व्यवसायीहरूले बताए। धेरैजसो व्यवसायीहरूले ब्याङ्कबाट ऋण लिएर, घरको सुनको गर-गहना बन्दक राखेर व्यापारको लागि लुगाहरू किनेका थियौँ। यस्तो परिस्थितिमा सरकारको तर्फबाट क्षतिपूर्ति नदिए आफूहरूलाई धेरै समस्या हुनेछ। यसैले अग्नि पीडित व्यवासीहरूले क्षतिपूर्तिको माग गरेका छन्।