सिलगढी (निसं): राज्यको विभाजन बारे भाजपाको बयान के छ भन्दै आगामी 48 घन्टाको अवधिमा बताउनु पर्ने उत्तर बंगालको तृणमूल नेतृत्वले राज्य भाजपालाई समय सीमा तोकेको छ। आज सिलगढी जर्नलिस्ट्स क्लबमा तृणमूल नेतृत्वले गरेको पत्रकार सम्मेलनमा तृणमूल जिल्ला अध्यक्ष, सभानेत्री अनि उत्तरबंग विकास मन्त्री उपस्थित थिए। यस अवसरमा उत्तरबंग विकास मन्त्री उदयन गुहाले भने, केही दिन अघि असमका मुख्यमन्त्री हेमन्त विश्व शर्माले अलग त्रिपुरा राज्यको मांगलाई समर्थन गरेको थिएन तर पश्चिम बंगालमा भाजपाको विधायकले अलग राज्य गठन हुने कुरा बताएका थिए। जोन बारला र निशीथ प्रमाणिकले पनि अलग राज्यको कुरा गरिरहेका छन्। तथापि त्रिपुरामा भाजपाले यसको ठीक उल्टा भनिरहेको छ। भाजपाले दुई राज्यमा अलग-अलग बयान दिइरहेको छ। आगामी 48 घन्टाको अवधिमा भाजपा राज्य नेतृत्वले पत्रकार सम्मेलन गरेर आफ्नो बयान दिनु पर्ने तिनले बताएका छन्। यदि भाजपाले 48 घन्टाको अवधिमा कुनै प्रकारको बयान नदिए भाजपाले देखावटी मात्र गरिरहेको सम्झनु पर्ने तिनले थप बताएका छन्।