रक्षाबन्धनमा कोरोनाको प्रभाव : फुलबारीमा राखी किन्न आउने ग्राहकहरूमा कमी

राजगञ्ज : भोलि 22 अगस्त रक्षाबन्धन। कोरोना महामारीले गर्दा यस वर्ष पनि रक्षाबन्धनको पर्वमा प्रभाव पारेको छ। कोरोनाले गर्दा फुलबारीको दोकानहरूमा बिक्रीमा राखेको राखीहरू किन्ने मानिसहरूको कमी रहेकोले दोकानेहरू चिन्तित बन्न पुगेका छन्। प्रत्येक वर्ष रक्षा बन्धन अर्थात् राखीको अवसरमा सिलगढी संलग्न फुलबारी बजारमा केही दोकानेहरूले विभिन्न प्रकारको राखीहरू बिक्रीमा राख्ने गर्दछन्। तथापि, अन्य वर्षको तुलनामा यस वर्ष राखी बिक्री धेरै कम्ती भइरहेको छ। परिमल कृष्ण दास अधिकारी नाम गरेको एकजना राखी विक्रेताले कोरोनाले गर्दा यस वर्ष रक्षाबन्धनको पर्वमा कुनौ रौनकता नरहेको साथै धेरै कम्ती मात्रामा मानिसहरू राखी किन्न आउने गरेको बताए। प्रत्येक वर्ष लगभग 10 हजार रुपियाँको राखी बिक्री हुने गरे तापनि यस वर्ष त्यसको आधा पनि बिक्री हुन्छ कि हुँदैन भनेर तिनी चिन्तित छन्।