रञ्जन सरकारद्वारा सिलगढी नगरनिगमविरुद्ध क्षोभ प्रकट

सिलगढी : तृणमूल नेता रञ्जन सरकारले सिलगढी सहरको विविध विषयलाई लिएर सिलगढी नगरनिगमविरुद्ध क्षोभ प्रकट गरे। आज पत्रकार सम्मेलनको आयोजना गरेर नगरनिगम प्रशासक अशोक भट्टाचार्यले गर्दा नै सिलगढी सहरमा दोस्रो श्मशान घाटको निर्माण नभएकोले गर्दा श्मशान घाटमा धेरै दबाउ भइरहेको तिनले गम्भीर आरोप लगाए। यसको साथै श्मशान घाटको समस्याले गर्दा सहरवासीले पनि धेरै दुख भोग्न परिरहेको तिनले बताए। सिलगढी सहरमा धेरै मानिसहरू बाहिरबाट आएर बसोबास गरिरहेका छन् तर नगरनिगमलाई तिनीहरूबारे कुनै जानकारी नरहेकोले गर्दा सिलगढी नगरनिगम विफल भएको तिनले दावी गरे। तिनले अझ भने, राज्य सरकारले सबै बस्ती र कोलनीहरूलाई मान्यता दिएर पट्टा वितरणको काम शुरू गरेको छ। नगरनिगमको जमिनमा हरीजन समुदायको बस्तीहरू रहेको छ भने त्यो जमिनलाई पनि नगरनिगमले मालिकाना अधिकार दिनुपर्छ। अर्कोतिर, धेरै मानिसहरूले द्वारे सरकार कार्यक्रमबारे भ्रम फैलाउने प्रयास गरिरहेको तिनले बताए। बोरो अफिसबाहेक बाङ्ग्ला सहायक केन्द्रहरूमा पनि राज्य सरकारको विविध परियोजनाको काम चलिरहेको तिनले जानकारी दिए।