राष्ट्रिय राजमार्गमा टोटोको चलाचल निषेध, ट्राफिक पुलिसको अभियान शुरू

सिलगढी : सिलगढीको मुख्य सडकहरूमा टोटोको चलाचल निषेध गरिएको छ। अदालतको निर्देशअनुसार सिलगढीको राष्ट्रिय राजमार्गमा नम्बरयुक्त अथवा नम्बरविहीन टोटोको चलाचल गर्नमा अगावै निषेध गरिए तापनि विभिन्न सडकहरूमा हालसम्म टोटोको चलाचल यथावत् रहेको छ। अन्ततः राष्ट्रिय एवम् राजकीय सडकहरूमा टोटोको चलाचल बन्द गर्न ट्राफिक पुलिसले अभियान चलाएको छ। आज बिहानैदेखि सिलगढीको दार्जिलिङ मोड, नौकाघाट लगायत विभिन्न राष्ट्रिय राजमार्गहरूमा टोटोको चलाचल बन्द गर्नको लागि ट्राफिक पुलिसले अभियान चलाएर नौकाघाट मोडबाट धेरैवटा टोटोहरू जफत गरेको छ। आज दिउँसोसम्म केही टोटोहरू रोकेर राखेपछि ट्राफिक पुलिस अधिकारीको निर्देशअनुसार छोडिदिएको छ। तथापि, पुलिसले कुनै पनि टोटो चालकहरू विरुद्ध कानुनी कार्वाही नगरेर टोटो चालकहरूलाई चेताउनी दिएर छोडिदिएको बताइएको छ।