सिलगढी : सिलगढीको रेगुलेटेड मार्केटमा गत केही दिनदेखि दुई गुटले आफ्नो प्रभुत्व जमाउनको लागि आपसमा झगडा गरिरहेको थियो। आज एकपल्ट फेरि उमाशंकर र श्याम यादव गुटमा झगडा हुँदा रेगुलेटेड मार्केटमा तनाउको माहौल उत्पन्न भएको आरोप रहेको छ। दुई गुटमाझको झगडामा 2 जना मजदुर गम्भीर रूपमा घाइते भएको बताइएको छ। घटनाको खबर पाएर प्रधान नगर थाना पुलिस घटनास्थलमा पुगेर परिस्थिति नियन्त्रणमा ल्याए। घाइते मजदुरले बताएअनुसार आज बिहान तिनीहरू गद्दीमा काम गर्नको लागि गएको समय श्याम यादव गुटका मानिसहरूले तिनीहरूमाथि हमला गर्दै आफू घाइते भएको हो। उमाशंकर गुटले आफ्नो गुटका मानिसहरूमाथि श्याम यादव गुटले हमला गरेकोमा प्रतिवाद जनाउँदै आईएनटीटीयुसी ब्यानरमुनि प्रधान नगर थाना अघि विरोध प्रदर्शन गर्नको साथै श्याम यादव गुटका 31 जनाविरुद्ध थानामा लिखित अभियोग दर्ता गरेको छ।