मङपु : मङपु गोल्डकप फुटबल प्रतियोगिता अन्तर्गत यहाँको जनमैदानमा आज खेलिएको अति रोमाञ्चक पहिलो क्वार्टर फाइनल म्याचको निर्धारित समय अवधि दुवै टोलीले बराबर गोल गरेपछि अन्तमा खेलाइएको ट्राई ब्रेकरमा सिलगढी युनाइटेडलाई नर्थ बेङ्गल आर्म्ड पुलिसले पराजित गर्यो। आजको पहिलो क्वार्टर फाइनल म्याच शुरूदेखि नै खुबै रोमाञ्चक रह्यो भने खेलको पहिलो हाफसम्म दुवै टोलीबाट कुनै गोल गर्न सकेन। दोस्रो हाफको 16औँ मिनटमा नर्थ बेङ्गल आर्म्ड पुलिसको तर्फबाट पहिलो गोल गरेर बढत हासिल गर्यो भने यसको लगत्तै 4 मिनटपछि फेरि सिलगढी युनाइटेडका चर्चित खेलाडी करण राईले विपक्षी नेटमा गोल छिराएर स्कोर बराबरीमा पुर्याए।
खेलको निर्धारित समयसम्म पनि कुनै गोल हुन नसकेपछि अन्तमा 1-1 गोलले बराबरीमा म्याच सकियो। यसपछि खेलाइएको ट्राई ब्रेकरमा 2 गोलको विरुद्ध 4 गोल गरेर नर्थ बेङ्गल आर्म्ड पुलिस विजयी बन्नको साथै सेमिफाइनल प्रवेश गर्यो। भोलि 20 नोभेम्बरको दिन दोस्रो क्वार्टर फाइनल खेल दार्जिलिङ एफसी बनाम कालेबुङ पुलिस माझ जम्काभेट हुनेछ।