सिलगढी जलपाईगढी राष्ट्रीय राजमार्गमा दुर्घटना, बाईकमा सवार 3 जना घाइते

राजगञ्ज, 9 दिसम्बर (निसं)। सिलगढी जलपाईगढी राष्ट्रीय राजमार्गको गण्डारमोड क्षेत्रमा भएको सडक दुर्घटनामा तीन जना घाइते भएका छन्। प्राप्त जानकारी अनुसार आइतबार राति सामान लोड गरेको एउटा लरी जलपाईगढीबाट सिलगढीतर्फ आउँदै थियो। लरी गण्डारमोडमा ट्राफिक सिग्नलमा रोकिएको थियो। त्यस समय पछाडीबाट तीव्र वेगमा आइरहेको एउटा बाइक लरीसित सोझै ठोक्कियो। उक्त दुर्घटनामा बाइकमा सवार तीन जना गम्भीर रूपमा घाइते भए। घटनाको खबर पाउन साथ राजगञ्ज थाना पुलिसका आईसी अनुपम मजूमदार, फूलबारी हाईवे ट्राफिक पोस्टका ओसी असित साहा र अन्य पुलिस कर्मचारीहरू घटनास्थलमा आइपुगे। यसपछि घाइतेहरूलाई उद्धार गरेर उत्तरबंग मेडिकल कलेज एवं अस्पताल पठाइदियो। राजगञ्ज थाना पुलिसले दुर्घटनाग्रस्त बाइकलाई जफत गर्नको साथै सम्पूर्ण घटनाको जाँच सुरु गरेको छ।