सडक दुर्घटनालाई रोक्न गुरू दयाल अधिकारीद्वारा लुकसान क्षेत्रमा सचेतना अभियान

लुकसान : राष्ट्रिय राजमार्ग 31 सी-को विशेष गरेर लुकसान संलग्न क्षेत्रहरूमा दिनहुँ बढ्दो सडक दुर्घटनाहरूलाई ध्यानमा राख्दै गुरू दयाल अधिकारीले आज दिनभरि नै विशेष गरेर चालकहरूलाई दुर्घटना सम्बन्धी सचेत गराए। धुपगढीको दौकीमारीबाट साइकलमा सवार भएर आएपछि तिनले सेफ ड्राइभ सेभ लाइफ सम्बन्धी चालकहरू लगायत यहाँका मानिसहरूलाई सचेत गराए। यसको साथै तिनले स्थानीय मानिसहरूसित एउटा सचेतना शिविरको पनि आयोजना गरेर सडक सम्बन्धी नियमहरूबारे अवगत गराउँदै दुर्घटनाहरूबाट बाँच्नको निम्ति लिफलेटहरू पनि वितरण गरे। स्मरण रहोस्, गुरू दयाल अधिकारीले गत केही वर्ष अघिदेखि नै सडक दुर्घटनाबारे मानिसहरूलाई सचेतना गराउँदै विभिन्न सचेतना शिविरहरूको आयोजना गर्नको साथै चालकहरूलाई सेफ ड्राइभ सेभ लाइफ-बारे अवगत गराउँदै आइरहेका छन्।