सडक मरमति गरिदिने मागमा गाउँलेहरूद्वारा पथ अवरोध गरेर विक्षोभ प्रदर्शन

फुलबारी : दीर्घदिनदेखि सडक बेहाल अवस्थामा रहेकोले गर्दा आज स्थानीय मानिसहरूले फुलबारी 2 नम्बर ग्राम पञ्चायतको गठमाबारी इलाकाको सडक अवरोध गरेर विक्षोभ प्रदर्शन गरे। प्रदर्शनकारीहरूको आरोप अनुसार धेरै दिन अघिदेखि सडक बेहाल अवस्थामा रहेकोले गर्दा उक्त सडक भएर वाहनहरू चलाचल गर्दा इलाकाभरि धुलो उड्ने गर्दछ। उक्त धुलोले गर्दा इलाकावासीहरूलाई प्रायःजसो सर्दी-खोकी हुने गर्दछ। उक्त सडकको मरमति गरिदिने माग गर्दै सम्बन्धित विभागलाई धेरैपल्ट अवगत गराए तापनि हालसम्म कुनै पहल गरेको छैन। यसैले आज बाध्य भएर आफूहरूले सडक अवरोध गरेर विक्षोभ प्रदर्शन गरेका हौँ। घटनाको खबर पाएर न्यु जलपाईगढी थाना पुलिस घटनास्थलमा पुगेर पथ अवरोध हटाएको बताइएको छ।