सङ्गीतकार तथा प्रधान अध्यापक सफल थापाको निधन

सिलगढी : सङ्गीतकार, गीतकार, गायक तथा नक्सलबारी उच्चत्तर माध्यमिक विद्यालयका प्रधान अध्यापक सफल थापा अब रहेनन्। हिजो राति 11 बजेर 25 मिनटमा तिनले सिलगढीको एउटा नीजि नर्सिङ होममा अन्तिम श्वास फेरेको पारिवारिक सूत्रले जनाएको छ। प्राप्त जानकारीअनुसार गत केही दिन अघि कोरोना संक्रमित भएपछि उनी कोरोनाबाट मुक्त पनि भइसकेका थिए भने तिनको रिपोर्ट नेगेटिभ आइसकेको थियो। तथापि, कतिपय शारीरिक समस्याहरूसँग तिनले सङ्घर्ष गरिरहेका थिए। यसै क्रममा सिलगढीको एउटा नर्सिङ होममा उपचाराधीन अवस्थामा गत राति तिनको निधन भयो। पेशाले प्रधान अध्यापक रहेका सफल थापा चर्चित गायिका द्वय स्नेहाश्री र सानिध्यकी पिता तथा गायिका एवम् रविरत्न ढुङ्गाना गर्ल्स स्कुलका प्रधानअध्यापिकाको पति थिए। तिनको निधनमा विभिन्न संघ-संगठन तथा सङ्गीत जगतकाहरूले गहिरो शोक व्यक्त गरेका छन्। आज सिलगढीको फाँसीदेवामा स्थित तिनको नीजि वासस्थानबाट तिनको अन्तिम संस्कारको लागि शवयात्रा निकालिइने भएको छ।