सन्तराज मङ्ग्रातीकृत “फेरि तिम्रो याद आयो” गीति सङ्कलनको लोकार्पण

सुकेपोखरी : राङभाङ समवय साहित्य सदनको पहलमा गीतकार सन्तराज मङ्ग्रातीकृत “फेरि तिम्रो याद आयो” गीति सङ्कलनको आज विधिवत लोकार्पण गरियो। नागरी फार्म सार्वजनिक भवनमा पीआर सुब्बाको अध्यक्षतामा सम्पन्न यस कार्यक्रममा दार्जिलिङ सरकारी महाविद्यालयका प्राध्यापक डा. राजकुमार छेत्री प्रमुख अतिथिको रूपमा उपस्थित थिए। पूर्व सचिव सुकराज दियालीको स्वागत भाषणपछि सचिव कृष्ण पी ठटाल तथा गोपाल शङ्खरले संयुक्त रूपमा सञ्चालन गरेको कार्यक्रमका विशिष्ठ अतिथिहरूमा राङभाङ बालसन अञ्चल, दार्जिलिङ, खरसाङ, मिरिक, सिलगढ़ी, कालेबुङ, डुवर्स आदि क्षेत्रका मुर्धन्य साहित्यकार, सङ्गीतकार, सामाजिक कार्यकर्ता तथा शिक्षण कर्मचारीको व्यापक उपस्थिति रहेको थियो। किशन प्रधानले कृतिकारको संक्षिप्त परिचय प्रस्तुत गरेको कार्यक्रमलाई कार्यक्रम अध्यक्षसँगै प्रमुख तथा विशिष्ठ अतिथिवर्गले सम्बोधन गरेका थिए। आफ्नो सम्बोधनमा साहित्यकार अर्जुन प्रधानले गायक कलाकार र सङ्गीतकार सरह गीतकारको पनि मूल्याङ्कन हुनसके उचित हुने मन्तव्य जाहेर गरे। यस अवसरमा स्थानीय साथै अथिति कलाकारवृन्दले गीत, नृत्य प्रस्तुत गर्नको साथै कार्यक्रममा उपस्थित कविहरूले कविता वाचन गरे।