साथीलाई अपहरण गरेको घटनामा अझ 1 जना पक्राउ

खोरीबारी : मित्रताको आडमा अपहरण गरेको अभियोगमा पुलिसले अझ एकजना युवकलाई पक्राउ गरेको छ। पक्रा परेका युवक खोरीबारीको वारिश जोत निवासी मानिक बर्मनको रूपमा चिन्हित गरिएको छ। गत 3 जुनमा साथीलाई अपहरण गरेको आरोपमा पुलिसले मणि बर्मनलाई पक्राउ गरेर अदालतमा पेश गरेपछि रिमान्डमा लिएर घटनाको जाँच शुरू गरेको थियो। उक्त जाँच अवधि अन्य एकजना युवकको नाम अघि आएपछि पुलिसले अभियान चलाएर मानिक बर्मनलाई पक्राउ गरेको बताइएको छ। पक्रा परेका 2 जना आरोपीलाई आज सिलगढी अदालतमा पेश गरियो। उक्त घटनामा अन्य कोही संलग्न छ अथवा छैन भन्ने विषयमा पुलिसले जाँच शुरू गरेको छ। स्मरण रहोस्, गत 1 जुनमा मणि बर्मनले फोन गरेर कुचबिहारबाट मृत्युञ्जय अधिकारीलाई बोलाएपछि मृत्युञ्जयलाई अपहरण गरेर तिनको परिवारका सदस्यहरूलाई रुपियाँको माग गर्नथाले। मृत्युञ्जयको परिवारका सदस्यहरूले घटनाबारे थानामा अभियोग दर्ता गरेपछि अभियोगको आधारमा जाँचमा जुटेका पुलिसले मणिलाई पक्राउ गरेर सोधखोज गरेपछि मानिक बर्मनलाई पक्राउ गरेको बताइएको छ।