सिक्किममा तीन महिना व्यापी वाहन जाँच अभियान शुरू

गान्तोक : सिक्किम राज्यको यातायात विभागले आज सोमबारदेखि तीन महिना व्यापी सडक सुरक्षा एवम् सह प्रवर्तन अभियान शुरू गरेको छ। यस अवसरमा विभागीय अधिकारीहरूलगायत ट्राफिक पुलिसले वाहन तथा चालकहरूको आवश्यक काजगपत्र जाँच गर्नको साथै चालकले मद मदिरा सेवन गरेको छ कि छैन भन्ने कुराको पनि जाँच गरेको बताइएको छ। यो अभियान आजदेखि राज्यको चारैवटा जिल्लामा शुरू गरिएको सम्बन्धित सूत्रले जनाएको छ। यस अवधि सरकारी वाहनहरूको समेत कागजपत्र जाँच गरिएको अनि आवश्यक कागजपत्र देखाउन नसकेको खण्डमा सेन्ट्रल मोटर भेकल एमेन्टमेन्ट एक्ट अन्तर्गत दोबर जरिमाना लगाइएको बताइएको छ। सिक्किम राज्यमा पनि हालैदेखि भारत सरकारद्वारा जारी नयाँ मोटर भेकल एमेन्टमेन्ट एक्ट लागू गरेको विभागीय अधिकारीले जानकारी दिएका छन्। विशेष गरेर राज्यमा हुने दुर्घटनाहरूलाई रोक्नको निम्ति यसप्रकारको पहल शुरू गरेको तिनले बताए।