सिलगढी 39 नम्बर वार्डको टाइम कलको सौन्दर्यीकरण, अवैध निर्माण गरेको स्थानीय मानिसहरूको आरोप

सिलगढी :  सिलगढी 39 नम्बर वार्डको हैदरपाडाको एपीसी सरणीमा जडान गरेको टाइम कलको सौन्दर्यीकरण गरेपछि स्थानीय मानिसहरूले अवैध निर्माण गरेको आरोप लगाएका छन्। उक्त वार्डको टाइम कललाई अवैध रूपमा सौन्दर्यीकरण गर्नको साथै स्वर्गीय व्यक्तिको नामको फलक (नेम प्लेट) पनि लगाइएको छ। यसको साथै अवैध रूपमा बिजुलीको कनेक्सन जडान गरेपछि साँझको समयमा त्यहाँ बत्ती बल्ने गर्दछ। स्थानीय मानिसहरूले यसलाई स्वीकार गरेका छैनन्। स्थानीय एकजना युवकले बताएअनुसार उक्त इलाकामा पहिलादेखि नै पिउने पानीको कल जडान गरेको थियो। शासक दलका कसैले उक्त कलमाथि अवैध निर्माण गरेर स्वर्गीय व्यक्तिको नामको फलक लगाइएको छ। यसलाई चाँडै भत्काउनुपर्छ। यसो नगरेको खण्डमा आफ्ना पूर्वजहरूको नाममा वार्डको विभिन्न ठाउँका कलहरूलाई सौन्दर्यीकरण गरिने तिनले बताए। यस विषयमा 39 नम्बर वार्डका पूर्व काउन्सिलर रेबा सरकारले भनिन्, अवैध रूपमा यस प्रकारको कार्य गरिएको हो। प्रशासनले चाँडै नै यसविरुद्ध व्यवस्था गर्नुपर्ने तिनले माग गरिन्। अर्कोतिर, 39 नम्बर वारडका काउन्सिलर पिङ्की साहा सहरदेखि बाहिर रहेकोले गर्दा तिनीसित सम्पर्क गर्न सकेको छैन।