सिलगढी (निसं): सिलगढी प्रधान नगर थानाको दक्षिण पलाश इलाकाको 12 वर्षीय छात्राको अपहरण गरेर हत्या गरेपछि उक्त घटनालाई लिएर गत 24 घण्टादेखि तनाउपूर्ण स्थिति देखा परेको छ। गत राति हत्या आरोपीको ससुराली घरमा तोड़फोड़ गरेपछि फेर् आज साँझमा स्थानीय मानिसहरूले सड़कमा टायर जलाएर विक्षोभ प्रदर्शन गरे। अर्कोतिर, तनाउको स्थितिलाई ध्यानमा राखेरगत रातभरि नै इलाकामा अधिक संख्यामा पुलिस बल तैनाथ गरिएको थियो। घटनाक्रम अनुसार दक्षिण पलाश इलाकाको छैटौ श्रेणीमा पढ्ने एकजना छात्रा गत 5 दिसम्बर परीक्षा दिनको लागि स्कूल गएका थिए। तर परीक्षा सकेपछि पनि घर नफर्किए पछि छिमेकीको ज्वाईं मनोज रायले अपहरण गरेको आरोप लगाउँदै परिवार पक्षले प्रधान नगर थानामा प्राथमिकी दर्ता गरेको थियो। अपहरण गरेको 8 दिन पछि गत साँझमा छात्राको शव सुकना वन क्षेत्रको खैरानीबाट उद्धार गरेको थियो। यसपछि इलाकामा तनाउको स्थिति उत्पन्न भएको छ। हत्या आरोपीको ससुराली घरमा गत राति आक्रोशित मानिसहरूले ढुंगा-मुढा गर्नको साथै तोड़फोड़ गरे।
यसैगरी, फेरि आज साँझमा पीड़ित परिवार अनि स्थानीय मानिसहरूले आरोपीलाई पक्राउ गर्न पुलिस असमर्थ रहेको आरोप लगाउँदै पुलिस प्रशासन विरूद्ध टायर जलाएर प्रदर्शन गरे। यसको साथै घटनाको सीबीआई जाँच गरिनु पर्ने माग पनि गरे। प्रशासनले तनाउको स्थितिलाई ध्यानमा राखेर छात्राको शव पोस्टमार्टम पछि परिवारका सदस्यहरूको उपस्थितिमा आज साहुडांगीमा अन्तिम संस्कार गऱ्यो।