सिलगढीबाट निखोज नाबालक कश्मीरबाट उद्धार

सिलगढी: सिलगढीको पञ्चनई इलाका अगमसिंह नगरबाट हराएको एकजना 14 वर्षीय नाबालकलाई प्रधान नगर पुलिसको एउटा विशेष टोलीले जम्मू -कश्मीरको बारामूलाबाट उद्धार गरेको छ। प्राप्त जानकारी अनुसार सिलगढी प्रधान नगर थाना अन्तर्गत पञ्चनई इलाकाको अगमसिंह नगरका 14 वर्षीय नाबालक गत 31 मईदेखि घरबाट लापत्ता भएका थिए। यसपछि धेरै सोध खोज गर्दा पनि नभेट्टाइए पछि तिनका अभिभावकले गत 8 जूनको दिन प्रधान नगर थानामा यसबारे लिखित जानकारी दिएका थिए। यसैबीच हराएको नाबालकले आफ्नो आमालाई फोन गरेर आफु जम्मू–कश्मीरको बारामूलामा रहेको जानकारी दिए। यसपछि प्रधान नगर थानाको एउटा टीम बारामूला पुगेर स्थानीय पुलिसको सहयोगमा उक्त नाबालकलाई त्यहाँ एउटा बर्फ कारखानाबाट उद्धार गरेको बताइएको छ। यसपछि सिलगढीमा ल्याइ पुऱ्याएर उक्त बालकलाई बाल कल्याण समिति (सीडब्ल्यूसी), दार्जिलिङ समक्ष पेश गरेपछि तिनीहरूकै आदेश अनुसार तिनका अभिभावकलाई सुम्पिदिएको छ।