सिलगढी इन्दिरा गाँधी मैदानमा दुई दिवसीय स्वास्थ्य मेला हुने

सिलगढी: लायन्स क्लब अफ् सिलगढी सेभियर्सको तत्वावधानमा सिलगढीमा दुई दिवसीय स्वास्थ्य मेलाको आयोजना गरिने भएको छ। सिलगढीको इन्दिरा गान्धी मैदानमा आगामी 27 र 28 फरवरीको दिन सम्पन्न हुने स्वास्थ्य मेलामा देशका विभिन्न ठाउँहरूबाट लगभग 50 जना डाक्टर आउने भएका छन्। आज सिलगढी जर्नलिस्ट्स क्लबमा पत्रकार सम्मेलन गरेर लायन्स क्लब अफ् सिलगढी सेभियर्सको तर्फबाट डा. शैलेश झाले यसबारे जानकारी दिएका छन्।तिनले बताए अनुसार सिलगढीमा पहिलो पल्ट यस प्रकारको स्वास्थ्य मेलाको आयोजना गरिने भएको छ। सिलगढीमा केही बिमारीहरूको लागि अझसम्म डाक्टरहरूको कमी रहेको छ भने यस मेला अवधि लगभग सबै बिमारका विशेषज्ञ डाक्टरहरूको उपस्थिति रहने तिनले जानकरी दिएका छन्। स्वास्थ्य मेलामा बिहान 9 बजेदेखि अपरान्ह 4 बजेसम्म बिमारीहरूले सम्बन्धित रोग विशेषज्ञ डाक्टरहरूसित सर-सल्लाह लिनसक्ने साथै नि:शुल्क दवाईहरू वितरण गरिने बताइएको छ।