सिलगढी जलपाईगढी राष्ट्रिय राजमार्गमा भैंसी बोकेको कन्टेनर सहित चालक पक्राउ

राजगञ्ज, 4 नोभेम्बर : राजगञ्ज थाना पुलिसले भैंसी बोकेको एउटा कन्टेनर जफत गर्नको साथै एकजना व्यक्तिलाई पक्राउ गरेको छ।
घटनाक्रम अनुसार, आइतबार राति सिलगढी जलपाईगढी राष्ट्रिय राजमार्गस्थित फाटापुकुर टोल गेटको नजिक पुलिसले अभियान चलाएर एउटा कन्टेनरलाई छानबिन गर्दा 21 वटा भैंसी र 22 वटा भैंसीका पाडाहरू उद्धार गरेका छन्। वैध कागज पत्र नहुँदा पुलिसले गाडीका चालकलाई पक्राउ गरेको छ।
पुलिसले बताए अनुसार, उक्त भैंसी बोकेको कन्टेनर बिहारबाट असम तर्फ जान लागेको थियो। तर, गोप्य सूचना अनुसार कार्वाही गर्दै कन्टेनर रोखिएको थियो। पक्रा परेका व्यक्तिलाई सोमबार जलपाईगढी अदालतमा पेश गरियो।
त्यसैगरी, गोप्य सूचनाको आधारमा बेलाकोबा आउट पोस्ट पुलिसले राजगञ्जको मझियाली ग्राम पञ्चायतको डांगापाडामा छापामार अभियान चलाएर 39 वटा भैंसी अनि 44 वटा भैंसीका पाडाहरू उद्धार गरेका छन्। यद्यपि, यस घटनामा कसैलाई पनि पक्राउ गरेको छैन। सम्पूर्ण घटनाको जाँच चलिरहेको छ।