सिलगढी : सिलगढी सहरको गैर सरकारी नर्सिङ होम तथा डाइगोनेस्टिक सेन्टरहरूमा उपचारको नाममा रुपियाँ लुट्ने गरेको आरोप लगाउँदै दार्जिलिङ जिल्ला कङ्ग्रेसले आज सिलगढी महकुमा स्वास्थ्य विभाग अघि विक्षोभ प्रदर्शन गर्यो। यस अवसरमा दार्जिलिङ जिल्ला कङ्ग्रेसका सभापति शङ्कर मालाकार पनि उपस्थित थिए। तिनले भने, नर्सिङ होम तथा प्याथोलजी सेन्टरहरूले रोगीको परिवारका सदस्यहरूबाट इच्छाअनुसार बील लिने गर्दछन्। जिल्ला स्वास्थ्य विभागले यसबारे कुनै पहल नगरेको आरोप रहेको छ। गैर सरकारी नर्सिङ होमहरूमा रोगीका परिवारहरूलाई उपचारको नाममा रुपियाँ ठग्ने गरेकोले यसलाई रोक्नको लागि मुख्यमन्त्री ममता ब्यानर्जीले हस्तक्षेप गर्नुपर्ने मागमा आज जिल्ला कङ्ग्रेसको तर्फबाट तिनलाई महकुमा परिषदमार्फत् ज्ञापन पत्र चढाएको बताइएको छ।