सिलगढी खालपाड़ाको एउटा ट्रान्सफार्मरमा आगलगी

सिलगढी : सिलगढी नगरनिगमको आठ नम्बर वार्ड अन्तर्गत पर्ने खालपाड़ा नयाँ बजार इलाकामा अचानक आज दिउँसो ट्रान्सफार्मरमा आगो लाग्दा इलाकामा भागदौड मच्चियो। स्थानीय मानिसहरूले बताएअनुसार अनुसार नयाँ बजार इलाकामा बिजुली, केवल, इन्टरनेट बाहेक अन्य वायर (तार)-को गुच्छा जताभावी रहेकोले उक्त आगलागी भएको बताइएको छ। आगलागी हुन केही समय अघि ट्रान्सफार्मरबाट जोडले आवाज निस्कनको साथै तेल पनि निस्केको थियो। यसपछि ट्रान्सफार्मरबाट आगोको लपेटा निस्केर सडकमा झर्यो। इलाकाका व्यापारी तथा स्थानीय मानिसहरूले उक्त आगोलाई निभाउने प्रयास गर्नको साथै आ-आफ्नो दोकान बन्द गरिदिए। यसको साथै घटनाबारे बिजुली विभागलाई जानकारी दिए। घटनाको खबर पाएर दमकल विभाग तथा पुलिस कर्मी घटनास्थलमा पुगे तापनि यसभन्दा अगावै स्थानीय मानिसहरूको सहयोगमा आगोलाई पूर्ण रूपमा नियन्त्रणमा ल्याइयो। उक्त आगलागीमा कसैको ज्यान माललाई कुनै क्षति नभएको बताइएको छ।