सिलगढीको 22 नम्बर वार्डमा हाईटेन्सन इलेक्ट्रिक पोलमा आगलागी

सिलगढी : सिलगढी नगरनिगमको 22 नम्बर वार्डको सूर्यसेन स्ट्रिटमा इलेक्ट्रिक पोलमा सर्ट सर्किटको कारण आगलागी भएपछि इलाकाका मानिसहरू आतङ्कित बने। प्राप्त जानकारी अनुसार सडकमा हाईटेन्सन इलेक्ट्रिक पोलबाट ठुलो आवाज आएको सुनेपछि स्थानीय मानिसहरू घरदेखि बाहिर निस्केर हेर्दा नरिवलको रुखको हाँगा इलेक्ट्रिकको पोलमा झरेकोले गर्दा आगलागी भएको थाहा पाए। घटनाबारे तत्कालै दमकल तथा विद्युत विभागलाई खबर दिएपछि दमकलको एउटा इञ्जिन घटनास्थलमा पुगेर आगोलाई नियन्त्रणमा ल्याइयो। यसपछि विद्युत विभागका कर्मचारीहरूले रुखको हाँगा काट्ने कार्य शुरू गरेको बताइएको छ। सटीक समयमा दमकल तथा विद्युत कर्मचारीहरू घटनास्थलमा पुगेकोले गर्दा कुनै ठुलो दुर्घटना हुनबाट जोगियो। स्थानीय मानिसहरूले दमकल तथा विद्युत विभागका कर्मचारीहरूलाई धन्यवाद दिए।