सिलगढी : आस्थाको महान् पर्व छठ पुजा आज साँझ सिलगढीको विभिन्न नदीका घाटहरूमा छठव्रतधारीहरूले आस्थाको साथमा पुजा अर्चना गर्नको साथै अस्ताइरहेको सूर्यलाई अर्घ्य दिए। छठव्रतधारीहरूले भोलि बिहान पुनः घाटमा गएर छठ माताको पुजा अर्चना गर्नको साथै उदाउँदो सूर्यलाई अर्घ्य दिएर पुजा समापन गर्नेछन्। कोरोना महामारीले गर्दा गत दुई वर्षदेखि सामान्य रूपमा छठपुजाको आयोजना गरे तापनि यस वर्ष स्थिति सामान्य रहेकोले गर्दा सिलगढीको विभिन्न नदी घाटहरूमा धुमधामको साथमा छठपुजाको आयोजना गरिएको छ।
छठपुजा अवधि कुनै प्रकारको अप्रिय घटना नहोस् भन्ने उद्देश्य लिएर विभिन्न छठघाटहरूमा पुलिसले विशेष नजरदारी गरिरहेको छ भने एनडीआरएफ-को टोली पनि नदीमा उतारेको छ। सिलगढी महानन्दा लालमोहन मौलिक निरञ्जन घाट, नौकाघाट, चम्पासरी, महानन्दा लगायत विभिन्न ठाउँहरूमा छठव्रतीहरूले आस्था भक्तिको साथमा आज पुजा अर्चना गरे।