सिलगढीको डन बस्को प्राइमेरी स्कुल मैदानमा 500 रुपियाँमा स्वाब टेस्टको व्यवस्था

सिलगढी : सीआईआई, यङ इन्डियन्स र डन बस्को एलुमनी संस्थाले केवल 500 रुपियाँमा कोरोना आरटीपीसीआर टेस्टको व्यवस्था गरेको छ। सिलगढीको डन बस्को प्राइमेरी स्कुल मैदानमा एउटा शिविरको माध्यमद्वारा बिहान 9 बजीदेखि अपरान्ह 2 बजीसम्म उक्त टेस्ट गरिरहेको छ। साधारण मानिसहरूको सुविधाको लागि कम्ती खर्चमा आरटीपीसीआर टेस्टको व्यवस्था गरिएको छ भने कोरोना संक्रमणबाट बाँच्नको लागि अनलाइनको माध्यमद्वारा यसको शुल्क तिर्नुपर्ने बताइएको छ। उक्त शिविरमा दिनहुँ 100 जना मानिसहरूको स्वाब टेस्ट गरिनेछ। उक्त शिविरको उद्घाटन गत 26 मईको दिन भए तापनि आजदेखि स्वाब टेस्ट शुरू गरिएको छ। धेरैजना मानिसहरूले लाइनमा उभिएर आफ्नो स्वाब टेस्ट गरे भने 48-72 घण्टाको अवधिमा यसको रिपोर्ट पाउने बताइएको छ।