सिलगढी : सिलगढी मेट्रोपोलिटन पुलिसको डिटेक्टिभ डिपार्टमेन्ट (डीडी) र महिला थाना पुलिसले संयुक्त रूपमा सहरको विभिन्न ठाउँहरूमा अभियान चलाउँदा स्पाबाट 2 जना व्यक्तिलाई आपत्तिजनक अवस्थामा पक्राउ गर्नको साथै एकजना युवतीलाई उद्धार गरेको छ। पक्रा पर्ने व्यक्तिहरू विष्णु प्रसाद र भूपेनको रूपमा चिन्हित गरिएको छ। प्राप्त जानकारी अनुसार पुलिसले भक्तिनगर थाना अन्तर्गत पर्ने एउटा स्पा (सेलुन) साथै मतिगढास्थित एउटा सपिङ मलको स्पा (सेलुन)-मा पनि अभियान चलाएर आपत्तिजनक सामग्रीहरू उद्धार गरेको बताइएको छ। यसबारे वेस्ट जोन डीसीपी कुँवर भूषण सिंहले बताएअनुसार सहरमा स्पाको नाममा अवैध धन्दा चलाइरहेको गोप्य सुइँको पाएपछि केही स्पाहरूमा अभियान चलाएर 2 जना व्यक्तिलाई पक्राउ गरेको छ भने एकजना युवतीलाई उद्धार गरेको छ।
पक्रा परेका 2 जना व्यक्तिलाई जलपाईगढी अदालतमा पेश गर्नको साथै पुलिसले मामिलाको जाँच शुरू गरेको बताइएको छ। स्मरण रहोस्, हालै सिलगढीमा अवैध कल सेन्टर र स्पाको नाममा अवैध धन्दा चलाइरहेको अभियोगपछि तेलङ्गाना पुलिसले सिलगढी पुलिसको सहयोगमा केही व्यक्तिहरूलाई कल सेन्टरको नाममा अवैध व्यवसाय चलाएको आरोपमा पक्राउ गरेको थियो। यसको साथै तेलङ्गना पुलिसले पक्रा पर्ने 3 जनालाई ट्रान्जिट रिमान्डमा लिएर तेलाङ्गना लगेको थियो। यसपछि नै सिलगढी मेट्रोपोलिटन पुलिसले सहरको कतिपय ठाउँहरूमा स्पा तथा कल सेन्टरको नाममा अवैध व्यवसाय चलाइरहेको थाहा पाएपछि तिनीहरूविरुद्ध लगातार अभियान चलाइरहेको छ।