सिलगढीमा माछा पक्रिने क्रममा नदीमा डुबेर बालकको मृत्यु

सिलगढी, 16 नोभेम्बर (निसं): माछा समात्ने क्रममा नदीमा डुबेर एकजना नाबालकको मृत्यु भएको छ। यो घटना सिलगढी नगर निगमको 32 नम्बर वार्ड अन्तर्गत ज्योतिमय कोलोनीमा घटेको हो। प्राप्त जानकारी अनुसार, शनिबार दिउँसो तीन जना बालक महानन्दा नदीमा माछा पक्रिन गएका थिए। यसै क्रममा उनीहरू नदीमा पसेपछि पानीको बहाउमा तीनै जना नाबालक डुब्न थाले। त्यसै बेला स्थानीय एकजना युवकले नाबालकहरूलाई डुब्दै गरेको देखेर नदीमा हाम्फालेर ती नाबालकहरूलाई बाहिर निकाले। तर, 9 वर्षका एकजना बालकको घटनास्थलमा नै मृत्यु भएको थियो। घटनापछि यसबारे एनजेपी थानालाई जानकारी दिइयो। सूचना पाउन साथ पुलिस घटनास्थलमा पुगेर नाबालकको शव उद्धार गरेर पोस्टमार्टमको लागि उत्तरबंग मेडिकल कलेज एवं अस्पतालमा पठाइदिएको छ। यस घटनाले इलाकामा शोकको माहौल देखा परेको छ।