सिलगढीमा आग्नेयास्त्र सहित 3 जना बदमास पक्राउ

सिलगढी (निसं)। प्रधाननगर थाना पुलिसले आग्नेयास्त्र सहित 3 जना बदमासलाई पक्राउ गरेको छ। पक्रा परेकाहरूमा इमरान हुसेन, अब्दुल सलाम र सानी गुप्ता सामेल छन्। तिनीहरू सबै प्रधाननगर थाना अन्तर्गत इलाका निवासी हुन्। सूत्रले दिएको जानकारी अनुसार  प्रधाननगर थाना पुलिस टीमले गत अबेर राति चम्पासारी संलग्न इलाकामा केही बदमासहरू कुनै ठुलो अपराधिक घटनालाई अन्जाम दिने उद्देश्यले भेला भएको गोप्य सूचना पाएपछि उक्त इलाकामा अभियान चलाएर 3 जनालाई पक्राउ गरे तापनि केही बदमासहरूले घटनास्थलबाट सुइँकुच्चा ठोकेको बताइएको छ। पुलिसले पक्रा परेका आरोपीहरूबाट एउटा आग्नेयास्त्र, एउटा जिउँदो कार्तुस सहित केही धारिलो हतियार उद्धार गरेको छ। पुलिसले घटनाको जाँच शुरू गरेको छ।