सिलगढीमा अन्तर्राष्ट्रिय स्तरको स्टेडियम बनाउनुपर्ने मागमा रैली

सिलगढी : सिलगढीमा एथलेटिक्सलाई बढावा दिनको लागि सिन्थेटिक ट्र्याकयुक्त अन्तर्राष्ट्रिय स्तरको स्टेडियमको निर्माण गरिनुपर्ने मागमा सिलगढी एथलेटिक्स लभर्स एसोसिएशनले आज सिलगढीमा रैली निकाल्यो। सिलगढीको हासमी चोकबाट आज बिहान रैली निकालेर सहरको विभिन्न पथहरूको परिक्रमा गर्यो। उक्त रैलीमा सिलगढीका विधायक शङ्कर घोष, सिलगढी नगरनिगमका विपक्षी नेता अमित जैन लगायत अन्य उपस्थित थिए। यस अवसरमा विधायक शङ्कर घोषले भने, सिलगढीमा सिन्थेटिक ट्र्याक भएको स्टेडियम छैन। मैले सिलगढीमा एथलेटिक्सको विकासको लागि पूर्णाङ्ग स्टेडियम बनाउने विषयमा केन्द्रीय राज्यमन्त्री निशिथ प्रमाणिकसित कुराकानी गरिसकेको छु। कञ्चनजङ्घा स्टेडियममा मुख्यमन्त्रीको कार्यक्रमको आयोजना गर्ने गरेको विषयलाई लिएर पनि तिनले विरोध जनाए। अर्कोतिर, सिलगढीका मेयर गौतम देवले भने, खेलकूद हाम्रो हृदयमा छ। म खेलकूद बुझ्छु, म खेलाडीहरूको साथमा छु। यसलाई लिएर राजनीति गर्नु अति नै निन्दनीय हो।