सिलगढी : सिलगढी सहरको सडकहरूमा भाजपाको झण्डा जताततै फ्याँकिदिनको साथै झण्डाहरू जलाइदिएको मामिला अघि आएको छ। सिलगढी नगरनिगमको 47 र 27 नम्बर वार्डमा पनि यस प्रकारको मामिला अघि आएपछि सिलगढी विधानसभाका भाजपा प्रार्थी शङ्कर घोषले क्षोभ प्रकट गरे। विधानसभा चुनाउमा विरोधी पार्टीहरूले सिलगढी आसनमा हार निश्चित रहेको थाहा पाएर नै यस प्रकारको तुच्छ राजनीति गरिरहेको तिनले बताए। वाम-कङ्ग्रेस र तृणमूलले एक साथ मिलेर यस प्रकारको कार्य गरिरहेको तिनले आरोप लगाए।
विधानसभा चुनाउमा पराजय हुने अनि भाजपा सत्तामा आउनेबारे विरोधी पार्टीहरूलाई थाहा भइसकेकोले गर्दा नै सबै एक साथ मिलेर यस प्रकारको कार्य गरिरहेको तिनले आरोप लगाए। यसभन्दा अघि पनि देशका प्रधानमन्त्री नरेन्द्र मोदीको पोस्टरमा हिलो पोतिदिएको थियो भने अन्धकारको फाइदा उठाएर मेरो नाममा पनि पोस्टरहरू टाँसिएको तिनले बताए। जसले यस प्रकारको कार्यहरू गर्दैछ तिनीहरूलाई राजनीति नगर्ने तिनले सुझाउ दिए।