सिलगढीमा आईएसकेएफ नेशनल कराते च्यम्पियनशीप 2023-को आयोजना गरिने

सिलगढी : सिलगढी तराई स्कुल मैदानमा आगामी 7 र 8 जनवरीमा आईएसकेएफ नेशनल कराते च्यम्पियनशीप 2023-को आयोजना गरिने भएको छ। आज सिलगढी जर्नलिस्ट क्लबमा पत्रकार सम्मेलनको आयोजना गरेर संस्थाका सदस्यहरूले यसबारे जानकारी दिएका छन्। उक्त प्रतियोगितामा पश्चिम बङ्गाल बाहिरका मोट 7 वटा टोली असम, मणिपुर, नागाल्याण्ड, त्रिपुरा, उडिसा, महाराष्ट्र र उत्तरप्रदेशका प्रतियोगीहरूले अंश ग्रहण गर्ने भएका छन्। यसबाहेक पश्चिम बङ्गालको विभिन्न जिल्लाबाट मोठ 250 जना प्रतियोगीहरूले उक्त च्याम्पियनशीपमा अंश ग्रहण गर्नेछन्। यस च्याम्पियनशीपमा कराते महासंघका 50 जना  रेफ्रीहरूले दुई दिनसम्म खेल सञ्चालन गर्नेछन्। यसको साथै आईएसकेएफ स्टाइल चीफ मतुम बङ्किम सिंह पनि उपस्थित रहनेछन् भने प्रमुख अतिथिको रूपमा सिलगढीका मेयर गौतम देव उपस्थित रहनेछन्। संस्थाका सदस्य पियुष कान्ति बर्मनले बताएअनुसार उक्त च्याम्पियनशीपमा अंश ग्रहण गर्न आएका बाहिरका प्रतियोगीहरूलाई नि:शुल्क आवास तथा खानाको व्यवस्था गरिएको छ। ओजन र उचाइँ गरेर 63 वटा क्याटागोरीमा प्रतियोगिता सम्पन्न हुनेछ भने च्याम्पियन, फर्स्ट रनर अप र सेकेन्ड रनर अपलाई पुरस्कार प्रदान गरिनेछ। यसको साथै विजेताहरूलाई ट्रफी र प्रमाणपत्र प्रदान गरिनेछ।