सिलगढीमा महिलाको शव उद्धार, लोग्ने पक्राउ

सिलगढी, 19 नोभेम्बर (निसं): सिलगढीको भक्तिनगर थाना अन्तर्गत शान्तिपाडा इलाकाबाट एकजना महिलाको शव फेला परेपछि इलाकामा सनसनी मच्चिएको छ। मृतक महिलाको नाम डाली दास बताइएको छ। यस घटनामा पुलिसले डालीका लोग्ने सन्तोष रायलाई पक्राउ गरेको छ।
प्राप्त जानकारी अनुसार, लगभग आठ वर्ष अघि डाली र सन्तोषको विवाह भएको थियो। दुवैका एकजना सन्तान पनि छन्। विवाह भएपछि लोग्ने सन्तोषले डालीलाई बारम्बार कुटपिट र झगडा गर्ने गर्थे, जसका कारण डाली मानसिक रुपमा धेरै तनावमा थिइन्। सोमबार पनि सन्तोषले डालीसँग कुटपिट गरेपछि डाली आफ्नो माइता घर पुगेकी थिइन्। पछि डाली आफ्नो छोरीलाई ल्याउनका लागि सन्तोषको घर शान्तिपाडामा गएकी थिइन्। त्यसपछि साँझको समयमा डालीको मृत्यु भएको खबर तिनको माइताको परिवार पक्षले थाहा पाए।
यसपछि भक्तिनगर थानालाई यो सूचना दिइएको थियो। खबर प्राप्त भएको तुरुन्तै भक्तिनगर थाना पुलिस घटनास्थलमा पुगेर डालीको शवलाई उद्धार गरे। यसपछि शवलाई उत्तर बंगाल मेडिकल कलेज एवं अस्पतालमा पोस्टमार्टमको लागि पठाए दिएको छ। यसको साथै मृतकका लोग्ने सन्तोषलाई सन्देहको आधारमा पुलिसले पक्राउ गरेको छ। तथापि, हालसम्म डालीले आत्महत्या गरेको हो कि उसको हत्या गरिएको हो भन्ने स्पष्ट थाहा लागेको छैन। पुलिसले घटनाको विस्तृत जाँच गरिरहेको छ।