सिलगढीमा मोबाइल छिनताई गर्ने 3 जना युवक पक्राउ

सिलगढी (निसं): प्रधान नगर थाना पुलिसले मोबाइल छिनतईको आरोपमा तीनजना युवकलाई पक्राउ गरेपछि आज सिलगढी अदालतमा पेश गर्यो। पक्रा परेका युवकहरूमा विकास महतो (21), रोशन लामा (20) र सुशान्त राणा (21) सामेल छन्। तिनीहरू सबैजना 3  नम्बर वार्डको गुरुङ बस्ती निवासी हुन्। सूत्रले दिएको जानकारी अनुसार गत 19 फरवरीमा मतिगढा खप्रेल मोड इलाका निवासी एउटी युवती कामबाट घर फर्किरहेको समय मल्लागढी संलग्न इलाकामा बाइक सवार तीनजना युवकले उक्त युवतीको मोबाइल छिनताई गर्यो। युवतीले घटनाबारे थानामा अभियोग दर्ता गरेपछि अभियोगको आधारमा जाँचमा जुटेका पुलिसले इलाकामा जडान गरेको सीसीटीभी फुटेजको सहयोगमा मोबाइल छिनताई गर्दा प्रयोग गरेको बाइकको पहिचान गरेपछि हिजो अबेर राति गुरुङ बस्ती इलाकाबाट 3 जना युवकलाई पक्राउ गरेको बताइएको छ। पुलिसले घटनाको जाँच शुरू गरेको छ।