सिलगढी : एनजेपी थाना पुलिसले हिजो राति सादा पोशाकमा अभियान चलाएर नशालु पदार्थसहित दुईजना व्यक्तिलाई पक्राउ गरेपछि आज जलपाईगुढी अदालतमा पेश गर्यो। पक्रा परेका व्यक्तिहरू देव कुमार दास र अनिल महतोको रूपमा चिन्हित गरिएको छ भने तिनीहरूमध्ये एकजना पश्चिम धनतला निवासी अनि अन्य एकजना मतिगढा निवासी हुन्। गोप्य सूचनाको आधारमा एनजेपी थाना पुलिसले सादा पोशाकमा गत राति एनजेपी थाना अन्तर्गत पर्ने गोरामोड़ इलाकामा अभियान चलाएर नशालु पदार्थसहित दुईजना व्यक्तिलाई पक्राउ गरेको बताइएको छ।
जफत गरेको नशालु पदार्थको अनुमानित बजार मूल्य 70 हजार रुपियाँ रहेको थाहा लागेको छ। पुलिस सूत्रले दिएको जानकारी अनुसार देव कुमार दास धेरै समय अघिदेखि अवैध गतिविधिमा संलग्न रहेका थिए भने पुलिसले तिनको खोजी गरिरहेको थियो।