सिलगढीमा रेलवे लाइन नजिक झगडा गरिरहेको समय ट्रेनको चपेटमा परेर दुईजना गम्भीर घाइते

सिलगढी, 3 सेप्टेम्बर (निसं): रेलवे लाइनको नजिकमा झगडा गर्दै गरेका दुई जना व्यक्तिलाई ट्रेनको चपेटमा परेर गम्भीर चोट लागेको छ। यो घटना सिलगढीको मल्लागढी टी अक्सन रोडको राम बहादुर रेल लाइन गेटको नजिकको हो। स्थानीय व्यक्तिहरूले बताए अनुसार, यी दुई व्यक्ति मातेको अवस्थामा रेल लाइनको नजिक झगडा गर्दै थिए। त्यति नै बेला उक्त रेल लाइनबाट महानन्दा ट्रेन गुडिरहेको थियो। झगडाको क्रममा दुवै व्यक्ति ट्रेनको पछिल्लो बोगीको चपेटामा परेका छन्। यस घटनामा एकजना व्यक्तिको हात र अर्कोको खुट्टा काटिएको छ। खबर पाउने बित्तिकै जंक्शन टाउन जीआरपी घटनास्थलमा पुगेर दुवै घाइतेलाई उद्धार गरेपछि तिनीहरूलाई अस्पताल पठाइदिएको छ। हाल जंक्शन टाउन जीआरपीले घटनाको सम्पूर्ण जाँच गरिरहेको छ।