सिलगढी समरनगरको सूर्य मन्दिरमा श्रद्धालुहरूको भीड

सिलगढी, 8 नोभेम्बर: सिलगढीमा शान्तिपूर्ण ढंगमा सम्पन्न भयो छठ पूजा। छठ पूजाको अन्तिम दिन आज सिलगढीमा अवस्थित उत्तर बंगालको एकमात्र सूर्य मन्दिरमा श्रद्धालुहरूको निक्कै भीड देखियो। सिलगढीको 46 नम्बर वार्डको समरनगर क्षेत्रमा अवस्थित गीता देवी घाटमा सूर्य मन्दिर छ। हरेक वर्ष झैँ यस वर्ष पनि यहाँ धूमधामको साथ छठ पूजाको आयोजना गरियो। यस दिन बिहान सूर्य मन्दिरमा पूजापाठ गर्न आउने भक्तजनहरूको भीड अत्याधिक रहेको थियो।
यस दिन मन्दिरमा महायज्ञको आयोजना गरिएको थियो। यसको साथै, असहाय व्यक्तिहरूलाई कम्बल वितरण पनि गरियो। कार्यक्रममा 46 नम्बर वार्डका वार्ड काउन्सिलर दिलीप बर्मन लगायत अन्य मानिसहरू उपस्थित थिए।