सुवास घिसिङको सालिग निर्माण कमिटीको सभा

खरसाङ : खरसाङको सामी लाखाङ गुम्बामा गोरामुमो-का संस्थापक अध्यक्ष स्वर्गीय सुवास घिसिङको सालिग निर्माण कमिटीको सभा सम्पन्न भएको छ। सामी लाखाङ गुम्बाको धर्म गुरु रिम्पोर्छे पेम्बा लामाको पहलमा स्वर्गीय सुवास घिसिङको सालिग बनाउन पहल गर्ने भनी पहिलेबाटै घोषणा गरेका थिए। तर बीचमा आफ्नो व्यस्तताले यस विषयमा पहल नभइरहेको र अब फेरि रिम्पोर्छे पेम्बा लामाको पहलमा नै घिसिङको सालिग निर्माण कार्यलाई जोड़ दिँदै आज पुन: सालिग निर्माण समितिको सभा सम्पन्न भएको बताइएको छ। सामी लाखाङ गुम्बामा धर्म गुरु पेम्बा रिम्पोर्छेको अगुवाईमा उक्त सभा बसियो। सभामा खरसाङ क्षेत्रका विभिन्न क्षेत्रमा रहेका व्यक्तिहरू उपस्थित भएर सुवास घिसिङको सालिग निर्माण विषयमा चर्चा परिचर्चा गरे। सभापछि पत्रकारहरूसित कुराकानी गर्दै सामी लाखाङ गुम्बाको धर्म गुरु पेम्बा रिम्पोर्छेले अब चाँढ़ै घिसिङको सालिग निर्माण गर्न पहल गरिने अनि सबैले यसमा कुनै राजनीतिक रुपमा होइन तर अघि आएर साथ दिने आह्वान् गरे। तिनले सुवास घिसिङ गोर्खाको पिता हुन् भन्दै यो कुनै राजनैतिक पहल नभएर सबै क्षेत्रको व्यक्तिहरूले स्वर्गीय सुवास घिसिङको सालिग निर्माण कार्यमा सहयोग गरिदिने आग्रह गरेका छन्।