खरसाङ (निसं) : जीटीएको स्वास्थ्य विभागको एमओडी सभासद श्याम शेर्पाले आज खरसाङ महकुमा अस्पतालको निरीक्षण गरे। उक्त निरीक्षण अवधि खरसाङ इञ्जिनियरिङ विभागका कार्यकारी अभियन्ता रिवाज बसेल, खरसाङ नगरपालिकाको एसएई गोबिन्द अधिकारी, भागोप्रमो खरसाङ देवराली समष्टिका प्रतिनिधिहरू र भागोप्रमो खरसाङ महकुमा प्रतिनिधि प्रणय रोका लगायत अन्यहरू उपस्थित थिए भने खरसाङ महकुमा अस्पतालको सुपरिडेन्डेन्ट डा. रुमी मण्डल पनि उपस्थित थिए। स्वास्थ्य विभागको एमओडी सभासद श्याम शेर्पाद्वारा गरिएको निरीक्षण अवधि खरसाङ महकुमा अस्पतालमा जड़ान गरिएको एक्स रे मशीन विषयमा चर्चा-परिचर्चा गरिएको जानकारी प्राप्त भएको छ।
उक्त एक्स रे मशीन अब आगामी एक हप्ताहभित्र सञ्चालनमा आउने भएको छ। त्यसरी नै खरसाङ महकुमा अस्पतालको महिला शौचालय, नर्स र डाक्टरहरूको क्वार्टर मरमत्ति विषयमा एमओडी सभासद श्याम शेर्पाले जीटीए चिफ् अनित थापालाई जानकारी गराएर मरमत्ति गराउने वचन दिएका छन् । यसको साथमा सभासद श्याम शेर्पाले खरसाङ महकुमा अस्पताल परिसर कसरी सर सफाई गर्न सकिन्छ भन्ने विषयमा चर्चा-परिचर्चा गरिएको बताइएको छ।