तकदाह: तकदाह चियाबारी अन्तर्गत कटुसे गोलाईदेखि सहिद सतपाल राईको घर भएर अप्पर माने डाँडासम्म पुग्ने 700 मीटर दुरीको बाटोको शिलान्यास जीटीए प्रमुख कार्यपाल अनित थापाले गरे। यो बाटोको नामकरण सहिद सतपाल राई मार्ग राखिएको छ। शिलान्यास कार्यक्रमलाई सम्बोधन गर्दै अनित थापाले भने, दोष दिनु होइन जागरूकताले नै पहाडलाई अघि लैजानु पर्छ। अहिले गाउँवासी जागरुक भएको देख्दैछु। बाटो बनिएको समय गाउँवासी नै जागरुक भएर काम हेर्नु पर्छ। बाटो बनिसके पछि कसैलाई दोष दिनु ठीक होइन। यदि बाटो राम्रो बनिएन भने गाउँवासी नै दोषी हुनेछन्।
तिनले अझ भने, जनताले जिताए पछि जनताको काम गर्नु नै पर्छ। स्थानीय सभासद्लाई पनि मैले बोलाएको थिए। सायद उनको अन्यत्र कामले गर्दा आउनु भएन। हामी पार्टी अलग्गै भए पनि जनताको निम्ति काम गर्नु कहिले पछि हट्दैनौ। हामीले पहाडमा बोल्ने परिवेश बनाई दिएका छौ, स्वच्छ वातावरण बनाई दिएका छौ। यस्तो परिवेशमा अब जनताले दोष अनि आरोप नलगाएर जागरुक बन्नु पर्छ। पहाडको विकाशको काममा सबैले आफ्नो सहभागिता देखाउनु पर्छ भन्दै अनित थापाले गनगन गरेर होइन जागरूक भएर पहाडलाई अघि लैजानु पर्छ भनी बताए।