तस्करी गर्न अगावै 50 वटा भैँसी उद्धार, 3 जना पक्राउ

फाँसीदेवा : तस्करी गर्न अगावै फाँसीदेवा थाना पुलिसले 50 वटा भैँसी उद्धार गर्नको साथै घटनामा 3 जना तस्करलाई पक्राउ गरेको छ। पक्रा परेकाहरू उत्तरप्रदेश निवासी 51 वर्षीय सकिम अहमद, मोहम्मद सब्बिर र सोनु सामेल छन्। प्राप्त जानकारी अनुसार गोप्य सूचनाको आधारमा फाँसीदेवा थाना पुलिसले घोषपुकुर फुलबारी बाईपासमा अभियान चलाएर 2 वटा कन्टेनर रोकेर छानबीन गर्दा 50 वटा भैँसी उद्धार गरेको बताइएको छ। पुलिस सूत्रले दिएको जानकारी अनुसार उद्धार गरेको भैँसीहरू बिहारबाट असममा तस्करी गर्ने उद्देश्यले लगिरहेको थियो। पक्रा परेका 3 जना तस्करलाई आज सिलगढी अदालतमा पेश गरियो। घटनाको जाँच शुरू गरेको पुलिस सूत्रले जनाएको छ।