ट्र्याक्टरको धक्का लागेर स्कुटी चालकको मृत्यु

खोरीबारी : ट्र्याक्टरको धक्का लागेर एकजना स्कुटी चालकको मृत्यु भएको छ। उक्त घटना खोरीबारी बतासीको शिमुलतला 327 नम्बर राष्ट्रिय राजमार्गमा घटेको हो। मृतक युवक नक्सलबारी उत्तर रथखोला निवासी सहदेव सरकार (26)-को रूपमा चिन्हित गरिएको छ। प्राप्त जानकारी अनुसार गत राति एउटा ट्र्याक्टर पानीट्याङ्कीदेखि खोरीबारीतर्फ गइरहेको समय विपरीत दिशाबाट आइरहेको स्कुटीसित आपस्तमा ठोक्किँदा स्कुटीमा सवार युवकको घटनास्थलमा मृत्यु भएको बताइएको छ। घटनापछि ट्र्याक्टर छोडेर चालकले घटनास्थलबाट सुइँकुच्चा ठोकेको थाहा लागेको छ। घटनाको खबर पाएर खोरीबारी थाना पुलिस घटनास्थलमा पुगेर ट्र्याक्टर आफ्नो नियन्त्रणमा लिनको साथै घटनाको जाँच शुरू गरेको पुलिस सूत्रले जनाएको छ।