सिलगढी : डाबग्राम-फुलबारी विधानसभा आसनका प्रार्थी गौतम देवले उक्त क्षेत्रको 10 वर्षको विकासमूलक कार्यहरूको रिपोर्ट कार्ड पेश गरे। आज तृणमूल कङ्ग्रेस जिल्ला कार्यालयमा एउटा पत्रकार सम्मेलनको आयोजना गरेर गौतम देवले उक्त रिपोर्ट कार्ड पेश गर्दै बङ्गालमा ममता सरकारले 10 वर्षको अवधिमा धेरै कार्यहरू गरेको दावी गरे। यसको साथै आउँदो विधानसभा चुनाउमा आफू विजय भएको खण्डमा गरिने विविध विकासमूलक भावी योजनाहरू बारेमा पनि तिनले बताए। तिनले आफ्नो विधानसभा क्षेत्र डाबग्राम-फुलबारीलाई मोडल विधानसभा बनाउने, डाबग्राम-फुलबारी क्षेत्रलाई नगरपालिकामा परिणत गर्ने, जमिनको पर्जापट्टा वितरण गरिने लगायत अन्य विविध भावी योजनाहरू बारे अवगत गराए। आफ्ना यी सबै भावी योजनाहरू ग्रामीण स्तरका सबै समक्ष पुर्याउने तिनले प्रतिबद्धता जाहेर गरे। यसको साथै चुनाउ प्रचारको लागि तिनले केही गीत तयार गरेको जसमा डाबग्राम-फुलबारीको विषयमा पनि उल्लेख गरिएको छ। यसको माध्यमद्वारा साधारण मानिसहरू समक्ष पुग्ने तिनले बताए।