दार्जिलिङ : भारतीय गोर्खा प्रजातान्त्रिक मोर्चाका अध्यक्ष अनित थापाले आज दार्जिलिङमा असंगठित युनियनका सदस्यहरूसित एउटा बैठक गरे। उक्त बैठकलाई सम्बोधन गर्दै तिनले भने, बाहिरबाट आएका श्रमिकहरूले यहाँ काम गर्न सक्छन् भने हाम्रा श्रमिकहरूले किन त्यहीँ काम गर्न सक्दैनन्। यसको मुख्य कारण हाम्रोमा काम गर्ने संस्कारको कमीले गर्दा हो। हाम्रा श्रमिकहरू केवल सजिलो काम मात्र गर्नु खोज्छन्। हाम्रा मान्छेको (श्रमिक) कौशलमा विकास गर्नुपर्छ, यसको निम्ति हाम्रा कामदारहरूलाई काउन्सिलिङको धेरै आवश्यक रहेको छ।
हाम्रो पहाडमा बाटोको कामहरू हुने गर्दछ। यसैले यहाँका मानिसहरू (श्रमिक)-लाई अलकत्रको काम सिकाउनु पर्छ। बिल्डिङ बनाउने स्किल श्रमिक तयार गर्नुपर्छ। अहिले श्रमिकहरूलाई सरकारले धेरै सुविधाहरू उपलब्ध गराएको छ। तर ती सुबिधाहरू हाम्रा श्रमिकहरूलाई कसरी उपलब्ध गराउनुपर्ने हो भन्ने विषयमा संगठनले काम गर्नु अनिवार्य रहेको तिनले बताए। हामीले पहाडमा रोजगार ल्याउने धेरै विकल्पहरू छ भने यी विकल्पहरूमाथि असंगठित संगठनले काम गर्नुपर्छ भनी तिनले बताए। आजको बैठकमा प्रजातान्त्रिक असंगठित श्रमिक युनियनको कनभेनरको रूपमा विकास सुनवारलाई नियुक्त गरियो।