युवा मोर्चा केन्द्रीय समितिको जामुनेमा सभा

दार्जिलिङ : गोर्खा जनमुक्ति युवा मोर्चा केन्द्रीय समितिको सभा आज दार्जिलिङस्थित जामुनेको एउटा गेस्ट हाउसमा अमृत योञ्जनको अध्यक्षतमा सम्पन्न भयो। उक्त सभामा युवा मोर्चालाई अझ बलियो बनाउने उद्देश्य लिएर केन्द्रीय समितिमा सदस्यको रूपमा डा. अश्वन्त कटवाल, प्राध्यापक विशाल बिके करण छेत्री र स्वरूप थापालाई मनोनित गरियो। आजको सभामा युवा मोर्चाले अबदेखि तृणमूल स्तरमा पुगेर कार्य गर्ने तथा आजसम्म गठन हुन नसकेको ठाउँहरूमा बुथ कमिटी गठन गर्नेलगायत पहाडको वर्तमान परिस्थितिबारे व्यापक चर्चा परिचर्चा गरियो। यसको साथै प्रत्येक महकुमा अनि खण्ड अस्पतालमा गएर युवा मोर्चाले कोरोना भाइरसबारे अस्पताल पक्षले के-कस्ता पहलहरू गरिरहेका छन् भन्नेबारे जानकारी लिने सभामा निर्णय लिएको बताइएको छ। सभामा युवा मोर्चाका प्रमुख सल्लाहकार सञ्जय थुलुङ, महासचिव अरूण छेत्री, उपाध्यक्ष द्वय उपकार नेचाली, निरेन लामा, सांगठनिक सचिव अतीत गुरुङ, प्रवक्ता अनित खाती सहित खरसाङ महकुमा समिति अध्यक्ष पेमेन्द्र गुरूङ, महासचिव विज्ञान मिश्र तथा विभिन्न समष्टिका युवा मोर्चा अध्यक्ष, सचिवहरूको उपस्थिति रहेको थियो।